الكثير من العراقيين تشوفه اليوم لابس قاط إيطالي ورباط فرنسي وقبوط وقندرة ( مكرم السامع ) ماركة ايطالي بالاف الدولارات والعطر صاعد فوووول يعني طالع على أخر حباية !!!
والسيارة لو ( GMC ) لو ( FORD ) على اخر موديل !
والعشة والغدة كله سفري ودلفري من ارقى المطاعم وسفرات وزيارات على راحتهم !
والراتب اربعة لو خمس مليون دينار بالشهر !
والويلاد لو يدرسون بالخارج على حساب الحكومة لو بالكليات الاهلية الغالية !!
وشقق وفلل وقصور ومزارع للونسة والسهرات وهذا كله من غير الخمط من ( المالات والدولارات والصفقات )!!
وفوگ هذا كله تلگاه يومية طالع يهووس بقناة ويصرخ ويصيح التغيير قادم والثورة قادمة ولازم نجتث هذا الحكم ونعيد أمجاد العراق العظيم !!!
والله ما ادري عن يا أمجاد الجماعة جاي يسولفون على امجاد اعدامات البعثيين بقاعة الخلد لو أمجاد تبيض السجون الي قاده عدي بالجملة لو على علي الكيمياوي لو ( الچفصة الي چفصها صدام وي ايران لو سالفة أم المعاليگ بالكويت )!!
هاي الزبايل ( حيشاكم ) حالهم اليوم من حال السوريين الي كانوا يتبطرون على نعمة وجود بشار الاسد !!
نعم أگول ( نعمة ) وجود بشار الاسد لان الي كان يسب ويشتم بشار بالامس فاليوم صار يتمنى تقبيل راس وإيد ورجل وحتى ( قندرة ) بشار الاسد ( لو ) وافق على ان يعود الى الحكم في سوريا !!
وكلامي هذا ليس من باب التزكية لبشار ونظامه ولا لبعض السياسين الحاكمين في العراق الان !!
ولكن اقتداءً بما روي عن أئمتنا عليهم السلام ( والٍ ظلوم غشوم ولافتنة تدوم )!!
وحتى لايروح الاخضر بسعر اليابس !!
المعنى ( الموزين الي تعرفة احسن من الزين الما تعرفه )
وبالفعل هذا هو الي جاي يصير بسوريا !!
هاي صار أكثر من شهرين والابرياء تذبح بالشوارع ( نساء ورجال وأطفال وعجائز ) يقتلون وعلى اتفه الاسباب !
والناس تصرخ ومحد يسمع صوتهم !!!
واسرائيل كملت الفلم واحتلت ثلاث محافظات !
وهم الناس تصرخ ومحد يسمع صوتهم !
وتركيا لعبت بالشمال طوبة !!
وهم محد يسمع صوتهم !
وقسد وامريكا اخذولهم صفحة والناس تلطم هناك وهم محد يسمعهم !!
يعني ( لا ) الجولا.. واوي يسمعهم !!
ولا أمة المليار مسلم تسمعهم ولا بابا المسيح يسمعهم ولا حتى العالم يسمعهم وصايرة عدهم كتلت البني آدم بفلس !!
وحتى لو سمعوهم .. هم ماراح يسوون شيء لان هذا هو المخطط المرسوم لسوريا !!
والمثل يگول ( الي يسوگ المطي يتحمل عطساته !!!!! )
الاغبياء كانوا يتصورون راح يصيرون مثل دبي وما اخذوا عبرة من العراق ومن السودان ومن ليبيا والصومال ومن كل الدول الي دخلته أمريكا بحجة التحرير !
امريكا تدخل من الباب وتجيب دا..عش والقاعدة يدخلون وياها من الشباچ وأول ماتعلگ السالفة بالمفخخات والانتحارين تشرد امريكا وتعوف الناس تتذابح بيناتهم !!
وهذا الي جاي يصير بسوريا اليوم فبعد الانقلاب رجعت امريكا وطمرت راسه بالرمل وچن كلشي ماكوا !!
حبيبي ابو قاط لاتستعجل على رزقك لان كل هذا الي تشوفه جاي يصير بسوريا هو أهوًن من الي راح يصير بالعراق وبالعراقيين !!
لان امريكا ( أم الخبزة ) مخططة للعراق وللعراقيين فد مخطط اتعس وانگس من مخطط سوريا بعشر قوط ( غسل ولبس ) وشر عالحبل بشهر تموز !!
يعني سالفتنه اذا انفتگت فما راح يرهم وياهَ أي خياط !!!
رباط سالفتنه ….
انت ابو قاط ورباط أبو ( ياكاع ترابچ كافوري ) وتهووس وادور على الثورة والانقلاب على النظام الحاكم بالعراق وتطالب امريكا بالتغيير الشامل … شراح يصير موقفك بذاك اليوم !
لو هم راح تشلع وتفلت مثل مافلتت بسنة 2014 وعفت ولد الخايبة تقاتل نيابة عنك !!
والله زمن …
